خدمة الاستشارات
استشارات القراء
اعزائى قراء واعضاء موقعنا الكرام . يسرنا تلقى استفساراتكم وطلبات الاستشاره بخصوص المشكلات الزوجيه والعلاقة بين افراد الاسرة وسيقوم بالرد عليكم نخبة من افضل الاساتذه دكاترة النفسية والاخصائيين الاجتماعيين والاستشاريين المتخصصين فى شئون الاسرة المختلفة وكذلك شيوخنا الافاضل فيما يخص النواحى الدينيه .
تفضلوا بكتابة المشكلة او موضوع الاستشاره سواء من خلال البريد العام او على ايميل الموقع للمشكلات التى تودون ان تظل خاصة ولا تطرح للقراءه الا من المختصين لدينا .
نتمنى ان نقدم لكم خدمة مفيده ،
نتمنى ان نقدم لكم خدمة مفيده ،
إدارة الموقع
خدمة الاستشارات
بواسطة حل المشاكل الزوجية
في
5:29 م
تقييم:
بواسطة حل المشاكل الزوجية
في
5:29 م
تقييم:
السلام عليكم ارجو تنصحوني فمشكلتي مع جوزى اللى بحبه اوى ان احنا عندنا 3 بنات و متجوزين من 11 سنه و ضحيت عشانه كتير واتحملت مشاكل كتير عشان نكمل حياتنا وعارفه انه ليحبني و يحترمني بس لاحظت عليه تصرفات غريبه مثلاً ( عنده حساب على الفيس بوك مخبيه عنى وضايف فيه ستات كتير وعامل متابعة لصفحات شمال ) مع أني بحاول ارضيه حتى على حساب صحتي و أطفالي و بهتم بكل أموره الصغيرة والكبيره و بلبس و بلتشيك بس للأسف الشديد مش قادره اواجهه باللى عرفته ومش عارفه اعمل ايه ؟
ردحذفحبيبتى ام البنات : فترة جوازك بسم الله ما شاء الله تجاوزت 11 سنة وده بفضل حكمتك وصبرك وحسن تعاملك مع حياتك الزوجية وربنا يحفظلك بناتك القمرات التلاته اكيد بتربيهم احسن تربيه وحرصك عليهم واجتهادك فى ارضاء جوزك بالحلال بالاهتمام بحبك له واللبس المهندم الشيك والمناسب لكل مناسبه خلال يومك . واجمل جمله سمعتها منك يا حبيبتى ثقتك فى انك بتحبيه وهوا بيحبك ويحترمك ودى ثقه بتعتمدى فيها على شخصيتك الجميله وانك حد عنده عزيمه واراده وعارف بيعمل ايه وبياخد ايه وعارف ان اهم عنصر بينكم هوا الحب والاحترام ، اما بخصوص الفيسبوك واللى حكيتيه فانا بشوف انك تتغافلى عن الموضوع كله من الاساس وكأنه ما كان لان دى نزوه او فراغ او ضعف هياخد وقته وهينتهى والموضوع لا يستحق منك اى قلق وتوتر طالما انتى دايما ماسكه زمام المبادره وانك بتعملى واجبك ناحية بيتك واولادك وجوزك وبتلمسى حبه واحترامه ليكى باستمرار ، اصبرى شويه والموضوع هينتهى لواحده وهيفضل بس بيتك وحبه ليكى ولبناته ، وربنا بسعد ايامك .
ردحذفانا مشكلتى اني الزوجة الثانية ، اعانى من قله الاهتمام وبيقضى وقت كتير برا البيت ومش مهتم بحقي الشرعي وبينام فى اوضه وانا فى اوضه ووقت الحق الشرعي بيكون فى دقايق قليله ، حاسه بوحده بصرف على نفسي لانى موظفة وصارحته وصارحة اهلي ومفيش فايده ولما هوا مش أد فتح بيت تانى بيبهدل ليه معاه بنات الناس ـ انا عاوزه اطلب الطلاق وألحق الباقى من عمرى ونفسيتى اللى اتدهورت ؟
ردحذفحبيبتى فى شوية تفاصيل مش واضحه فى عرضك لمشكلتك ، واحنا زى اى حد بيحل مشاكل بين طرفين بيهمه يسمع من الطرفين عشان يفهم حقيقة الوضع ويعرف يقيم الموقف لكن عشان دا غالبا مش بيحصل واللى بيبعت يطلب المساعده هوا بس اللى بنسمع منه فبنحاول قدر المستطاع نفهم منه كويس عشان نقدر ننصح فى الاتجاه الصح ، وعشان كدا بطلب منك ايضاح بعض النقط زى مثلا ايه موقف جوزك حاليا من مراته الاولى وهل عنده منها اولاد وهل اول ما اتجوزتو كان غير كدا واتغير دلوقتى بسبب مشكله بينكم واللا ازاى اتغير كدا فجأه ، والوقت اللى بيقضيه برا البيت بيبقى مع اصحابه واللا شغله واللا عند زوجته الاولى ، وهل موضوع نومه فى حجره تانيه دا نظام البيت عندكم من الاول واللا زعلان فبقى بينام فى حجره تانيه ، وهل تقصيره فى حقك الشرعى بيرجع لانه انانى مثلا وبيرضى نفسه وخلاص واللا عنده متاعب صحية بتسبب المشكله دى ، وهل انتى بتصرفى على نفسك من اول جوازكوا ودا متفقين عليه واللا كان بيصرف وبطل واللا حالته الماديه ضيقه ؟ اسئله كتير بتوضح لينا ازاى ننصحك فى الطريق الصحيح . لكن على اى حال وفى ضوء المعلومات اللى ذكرتيها حاليا انصحك بانك تتكلمى معاه فى جو جديد هادى وتهيئى القعده دى تكونوا فيها زى السمن على العسل وخلالها توضحى له اللى بيتعبك ومن غير لا عياط ولا عصبيه وتستعدى انك تسمعى منه حقايق او تبرير مش مهم ابدا المهم انك تنجحى توصلى له انك تعبانه كدا وبتعانى معاه لكن مش ممكن ابدا تسيبيه ومصممه تكملى حياتك معاه وتسعديه ويسعدك وتعتذرى له انك وصلتى الموضوع لاهلك قبل كدا وتوعديه ان اللى بينكم هيبقى دايما بينكم بس وهوا اهلك وجوزك وحبيبك واللى مش هتتنازلى ابدا انك تعيشى معاه سعيده وتسعديه . يارب نكون أفدناكى وربنا يهديلك الاحوال .
ردحذفالساده الافاضل اريد مشورتكم العاجلة فانا متزوج من سيده منذ 19 عاما وارهقتنى بسبب اهمالها لشكلها وانوثتها ولا تهتم بالمره بالحاجات دى ومع انى لفت انتباهها لدا كتير ووضحت لها انى مستقيد لكن احب الاقى عند زوجتى اللى ما ادورش عليه برا الا انها شوية تستجيب ايام وشوية تبرر باى تبرير وترمى المسئولية على اى حد فى انها معندهاش وقت ولا طاقه مع ان حياتنا بسيطه جدا ومفيش اعباء تمنع . انا بدأت احس انى عجوز ولازم الاقى نفسى تانى وارجع شبابى مع حد يقدر احتياجاتى لانى مليش فى الحرام . ارجو سرعة الرد .
ردحذفالاخ الفاضل : اهمال الست لانوثتها وشكلها على حد تعبيرك مش هوا المشكلة الحقيقيه فريما فى اسباب وضغوط تقع عليها وانت لا تعتبرها ضغوط ويكفى انك تجلس معها فى هدوء وتسمع منها وتحاول التخفيف عنها حتى لو كلامها ومبرراتها لا تقنعك وتوضح لها اهمية موضوع الاهتمام بالشكل والتزين وتشجعها عند كل محاولة منها بكلام حلو لان الست بتهتم جدا بالكلام الجميل والمجامله وهتلاقى تغيير كبير . وحاول ما تستعجلش والجهد اللى هتبذله معها ارحم كتير من جهد الله اعلم بحجمه ونتايجه فى ارتباط جديد خاصة ان عمر جوازكم 19 سنه ويستحق الصبر والمجهود .
ردحذفقضيت عمرى كله عشان ولادى . مش كأى اب عادى لا انا كنت اب وام بمعنى الكلمه ودى حاجه من سماتى الشخصيه حنان مع حسم وكنت دايما عند المقارنه بينىوبين نفسى بين شىء يخصهم او يخصنى محتاج وقت او فلوس بختارهم هما فورا وعشان كدا بأكد انى اخدت التمن سعاده ورضا عن نفسى وحب اولادى . لكن فجأه وبعد ان بداو سن الشباب انصرفوا عنى واصبح كل واحد فيهم عايش لنفسه وبينسونى فى ابسط الاشياء مع انى لسه بصحتى ومالى وانا اللى بعطى وببذل يعنى مش واقف عليهم بس زالت اسباب سعادتى لانشغالهم عنى مهما حاولت التقرب منهم . بيحبونى اه ومقدرين تضحياتى اه لكن يدونى وقتهم او اهتمامهم فدا نادرا . انا زعلان اوى وصعبان علي نفسى . اعمل ايه .
ردحذفكنت لسه بشوف بريد القراء لحل المشاكل الاجتماعيه وليه بيفضلوا يبعتوا لنا مشاكلهم على صفحة الفيس او واتس اب وليس على النموذج هنا وفجأه وصلتنى رسالتك . اقول لك اخى العزيز هون على نفسك فاولادنا يتعرضون لمتغيرات اجتماعيه وثقافيه وتكنولوجيه واقتصاديه تطحنهم بمعنى الكلمه واصبحوا فعلا ضحيه وليس الجانى . استمر فى دعم اولادك بحبك ووقتك ومالك واحتسب رعايتك لهم عند الله ولا تيأس من انصلاح احوالهم معك ابدا .
حذفبمناسبة الشهر الفضيل اشكو اليكم من تقصير اولادى فى العباده رغم انهم صائمون الا انهم لا يؤدون الفروض كامله لطول السهر ليلا والنوم نهارا ، رجاء نصحهم خاصة انهم يتابعون صفحتكم باستمرار .
ردحذف