ساعة الارض - كل سنه وانتوا طيبين

ساعة الارض - كل سنه وانتوا طيبين

       اكيد النهارده كلنا سمعنا عن موضوع ساعة الارض ، وأنا كنت بسمع عن المبادره دى من كان سنه بس مش بهتم والسنة دى حبيت افهم الموضوع فبحثت وسألت ولفيت لفه على كل حته ونوضع بيتكلم عن الموضوع وحبيت اوصل لكوا اللى انا عرفتو .

      الموضوع زى ما قلتلكم عباره عن مبادره عالمية واللى اوحى بالفكره هيا المظاهره  اللى قام بيها حوالى اتنين مليون واكتر من سكان مدينة سيدنى فى استراليا يوم 31 مارس عام 2007 وكانت فاعلياتها هيا اغلاق حوالى 2100 مشروع ومحل تجارى الاضواء بداخلهم وكمان الاجهزه الكهربية ايا كان نوعها لمدة ساعه عشان يعبرو عن فكرتهم وانهم حاسين بخطوره استعمال الكهربا اللى بتشتغل من حرق الوقود واللى بتسبب حرارة تحتبس فى الجو وبتأثر على المناخ عموما وكان من نتيجة الحركة دى فى خفض استهلاك الكهربا بنسبة 10.2 % . 

      وتوسع التعبير عن المبادره دى وبقى بيعبروا عنها باطفاء الاضواء فى الاماكن والمعالم البارزه وحفلات الزفاف وبعد كدا زاد الموضوع شوية بشوية وسنه ورا سنه وشاركت فيها مدن عالمية كتير وشركات كبيره واشخاص فى العالم كله ووصل عدد المشاركين فى الحملى حوالى 52 مليون فى 36 دولة بالعالم وفى سنة 2009 زاد المشاركين واصبح عدد المدن المشاركة 4000 مدينة واختاروا الوقت من الساعه 8.30 م لحد 9.30 م فى يوم السبت الاخير من شهر مارس كل سنة .

      والنهارده بما انه يوم السبت الاخير من مارس 2019 شاركت 189 دولة فى العالم فى مبادرة "ساعة الأرض" وعبروا عن ده باطفاء الانوار فى المدن والقرى السياحيه والاثرية والمحلات والاماكن الكبرى المهمه كتعبير عن تشجيعهم للناس والحكومات على تقليل الانبعاثات الحرارية وتأثيرها على البيئة والمناخ وشجعت منظمة الصندوق العالمى للطبيعه الموضوع وبقى زى ما احنا شايفين احتفالية عالميه تتنافس فيه الدول على انها تظهر رقيها وتحضرها وتساهم بشكل واضح اعلاميا للفكره دى وللعلم دبى هيا اول مدينة عربية شاركت فى الحدث دا سنة 2009 والسنة دى شاركت العاصمة الادراية الجديده بمصر فى الحدث وكانت لفته جميلة ومشاركة تستحق الاشاده .

      وعموما اى مبادره هدفها محاربة التلوث وترشيد الطاقة وتقليل الحرارة بتخدم الحفاظ على المناخ على الارض تستحق الترحيب واستحقت المجهود اللى بذلته فى بحث الموضوع وشرحه على الموقع ليستفيد الجميع .