نهاد أبو القمصان

          قريت مقال فى جريدة الوطن بتاريخ 29 مارس 2019  للكاتبة المبدعة والمحامية ورئيس المركز المصري لحقوق المرأة  نهاد ابو القمصان  وعجبنى المقال اوى لانه يعتبر وثيقة لاولويات المرأة المصرية خاصة ان الكاتبه ست مثقفه عامله ولها خبراتها وبالتالى فهو رأى اصقلته الخبره والعلم .

         واللى اقدر اوصله لحضراتكم ـ  دا غير مشاعرى بالسعاده والثقه اللى اخدتهم من مقال الاستاذه ـ  إن الست فى مصر تمتعت قضيتها بتطورات فى الفترة الزمنية الماضية  ، زى تعديل زيادة مشاركة المرأة فى البرلمان وتعيين المرأة فى مراكز قيادية عليا زى الدكتوره سحر نصر وزيرة الاستثمار والتعاون الدولي والدكتوره هاله السعيد وزيرة التخطيط والدكتوره غاده والي وزيرة التضامن الاجتماعي والسفيره نبيلة مكرم وزيرة الهجرة والدكتوره هالة زايد وزيرة الصحة والسكان والدكتوره إيناس عبد الدايم وزيرة الثقافة والدكتوره رانيا المشاط وزيرة السياحة والدكتوره ياسمين فؤاد وزيرة البيئة .          و زى تعديل بعض مواد قانون تشديد عقوبة الختان والتحرش ، الا ان فى حاجات تانية مهمه كتير تكمل النجاح والتطوير دا وتحديدا تشغيل النساء وعمل المرأة وتجهيز بيئة العمل لدعم عمل المرأة ، لان التقارير والاحصائيات بتأكد ان عمل المرأة بيساهم مباشرة فى رفع مستوى الصحه والتعليم فى الاسرة اللى هيا نواة المجتمع ككل ، وكمان عمل المرأه بيساعد على قدرتها على الخروج من دايرة العنف ضدها وضمان حياه افضل لها .

          وترى الاستاذه ان دا ممكن يظهر ويتحقق اكتر من خلال تعديل لقوانين قديمه بتحد وتقلل من مشاركة المرأة فى العمل ومن خلال إلزام الشركات اللى بتشتغل فيها اكتر من 100 امرأه بعمل حضانه للاطفال ، والغاء القرار رقم 155 لسنة 2003 اللى بيحدد الاعمال التى لا يجوز تشغيل النساء فيها ، وتسهيل اقتراض المرأه من هيئات الاقراض والحصول على خدمات ماليه لبدء مشروع صغير ، واتخاذ خطوات مباشره لتنفيذ قوانين الختان والزواج المبكر والتحرش والعنف ضد المرأه ، وتوفير الدعم من تقديم المشوره واستقبال الشكاوى الخاصه بذلك عن طريق الانترنت ، ومواجهة الزواج المبكر من خلال الغاء دفتر اثبات الزواج العرفى عند المأذون .

   الحقيقه مقال رائع ومميز ويستحق الاشاده به  ونتمنى ان يلقى تجاوبا وقبولا لدى المجتمع والمسئولين .