إذاعة القران الكريم

       الناس فى زمن القنوات الفضائية والانترنت بقت بتنسى ان فى حاجه اسمها اذاعة اساسا ، واغلب اللى بيشغلها ومش بقول كلهم بقى بيستبشر الصبح بالقران الكريم فى العربية او البيت او حد اضطرته الظروف لمتابعة ماتش سماعى وهوا مسافر بالعربية ومفيش فرصة يشوفه فى التليفزيون . وانا لا بقول ان دا غلط ولا بدافع عن الاذاعة .

       لكن انا شخصيا بحب الاذاعة ولها عندى مكانه خاصة وسحر الكلمه المسموعه اللى اشتغل عليها اعداد كويس ، وفنيين صوت ومؤثرات محترفين ، وإلقاء مميز بيجسد المعنى والحركه فى نبرة الصوت ، وكنت بعشق ناس كدا بالاسم واخاف اذكر حد وانسى حد . وكنت بحب انام وجنبى ترانزستور صغير كدا اقلب بين محطات وبرامج اذاعيه حلوه ومميزه .

       الاسبوع دا بتحتفل مصر بالعيد ال 55 لاذاعة القران الكريم واللى انطلقت سنة 1964 فى شهر مارس ودا كان دا بالتعاون بين وزارة الأوقاف والشؤون الاجتماعية، والمجلس الأعلى للشئون الإسلامية، والأزهر الشريف – وقتها -، للرد على انتشار نسخ محرفة للقرآن في بعض البلاد، وبعدين في سنة 1966 أضيف إليها برامج دينية  ودى كانت فكرة الشاعر الكبير محمود حسن إسماعيل .

        وفي سنة 1967 قدمت القرآن "المجود" بجانب "المرتل" بأصوات مشاهير القراء ، وحاليا من اجمل برامجها ( بريد الاسلام ، في ظلال الهدي النبوي ، براعم الإيمان ، خواطر الإمام ، دقيقة فقهية ، قطوف من حدائق الإيمان ، سيرة ومسيره ،  من وصايا الرسول ، من دوحة الدعاء ، حقائق وشبهات ، ... ) .
         الحقيقه يا اصدقائى كل برنامج من دول مدرسة فى مجال تخصصه وفرصه هايلة نتعلم الدين الصحيح الموثوق فى مصدره واهداف اللى بيقدموه وكمان خير من وسع زى ما بيقولوا ومفيش حد للمتعه والثقافة والثواب . 

كل سنة واذاعتنا الكريمه بخير يارب ،