سهير رمزى

         انا مش هواة الكلام عن الفنانين والمشاهير ودا لاسباب كتير لكن اللى فاجئنى هوا كلام الفناه الكبيره سهير رمزى لاحدى القنوات الفضائية وشافها الناس كلها عشان بس مصداقية الحوار – اتفاجئت بكلامها عن حجابها وانه احتشام مش حجاب والحجاب مرحلة من الحياه وانتهت واتخففت منه شوية بشوية وانها كبرت وانها بتتعامل مع ربنا ولها قوة احتمال وفى سن معين الواحده ممكن تخفف فيه وانها بتشوف واحده محجبه ولابسه بنطلون ضيق ودا مش حجاب وفى حاجات لازم نحجبها الاول زى النيه والكلام والاخلاق .

        والفنانه الكبيره لها تاريخ فنى طويل ومش هبقى قلت اللى ما يتعرفش عنها لو وضحت شوية معلومات عنها فهى :

سهير محمد عبد السلام نوح، اتولدت في بورسعيد سنة 1946 وامها الفنانة الراحلة درية أحمد . وهيا فى بداية حياتها اشتغلت مضيفه جوية وعارضة ازياء قبل ما تمثل فيلم الناس اللى جوه وبعدها فيلم ميرامار الشهير لرواية الكاتب الراحل نجيب محفوظ . 

وانها اعتزلت التمثيل سنة 1993 ورجعت تانى سنة 2006 فى مسلسل حبيب الروح . وانها اتجوزت حوالى 9 مرات واشهر ازواجها من الموسيقار حلمي بكر والفنان فاروق الفيشاوي والفنان محمود قابيل والأمير السعودي خالد بن سعود ، ورجل الأعمال سيد متولي رئيس نادي المصري ورجل الأعمال الخليجي محمد الملا. 

ومحدش ينكر ابدا انها طول عمرها فنانه متمكنه من عملها ولها ادوار كتير مميزه ودايما محبوبه لقلوبنا ولها ذكريات جميله عند كل جمهورها .

 اللى احب اعلق عليه فى حوارى هنا هو : هل يتفق جمهورها مع وجهة نظرها عن الحجاب والحشمه واللا فى وجهات نظر تانيه ؟

وهل الكلام دا مفيد لها كسهير رمزى واللا مفيد لقنوات فضائية عملت فرقعه على حسابها ؟

وهل التاريخ الطويل فى مشوارها الفنى ومكانتها فى نفوسنا تأثرت بالايجاب واللا السلب بعد الحديث ده ؟          انا حبيت يكون موضوع للحوار بينا خاصة انه عن حد غالى عندنا كلنا وفنانه محبوبة ولها مكانة كبيره فى قلوبنا كلنا .